Þann 10 nóvember leituðu Almannavarnir til Samtaka iðnaðarins vegna neyðarástands sem þá hafði verið lýst yfir í Grindavík. Kannað var hvort SI gæti sett saman hópa pípara og rafvirkja sem gætu komið að björgun húseigna frá yfirvofandi skemmdum á lagnakerfum. Haft var samband við formenn FP og SART sem þá voru staddir í erlendis ásamt viðskiptastjóra. Vel var tekið í þessa umleitan og SI kom þeim skilaboðum til Almannavarna að ef þörf yrði á aðstoð þá væri atvinnurekendur í þessum iðngreinum reiðubúnir að koma að þessu máli.
þann 23. nóvember var svo unnið mikið þrekvirki þegar að öflug sveit pípulagningamanna úr Félagi Pípulagningameistara fór að beiðni Almannavarna inn í Grindavík og kom hita á rúmlega 80 hús sem voru án hita eftir að hitakerfi HS veitna komst í lag eftir hamfarirnar dagana þar á undan. 

Í kvöldfréttum RÚV fimmtudag 23/11 var greint frá því að á milli 40 og 50 pípulagningamenn væru að störfum í Grindavík til að tryggja lagnir. Pípulagningasveit Almannavarna var mætt til Grindavíkur auk rafverktaka á vegum Samtaka rafverktaka. Starfsmenn HS Veitna voru einnig að störfum við að koma stofnlögnum í lag. Í viðtali Benedikts Sigurðssonar, fréttamanns, við Þorstein Einarsson hjá Lagnaþjónustu Þorsteins í Grindavík sem er aðili að Félagi pípulagningameistara kemur fram að það séu um 80 hús sem sé verið að koma hita á og gera þau klár fyrir veturinn sem sé að koma. Þorsteinn telur að það ætti að vera kominn hiti á öll hús eftir daginn. Það séu þó undantekningar, sum hús séu ónýt og bannað að fara inn í þau af öryggisástæðum en þau séu fá. Hann segir frá því að byrjað sé að mynda lagnir og hæðamæla. Þorsteinn segir að það sé ekki hægt að meta hvort lagnir séu ónýtar fyrr en búið sé að skoða þær.

Í fréttinni kemur fram að ekki sé búið að mynda þær lagnir í þeim hverfum sem verst hafa orðið úti. 

Sjá einnig frétt á vef SI Hér

Ráðstefna samtaka rafverktaka og pípulagningameistara á Norðurlöndunum, NEPU, var haldin 23.-26. ágúst í Finnlandi. Fulltrúar Íslands á ráðstefnunni voru Böðvar Ingi Guðbjartsson, formaður Félags pípulagningameistara, FP, Gunnar Sigurjónsson frá FP, Hjörleifur Stefánsson formaður Samtaka rafverktaka,  SART, auk Kristjáns D. Sigurbergssonar, framkvæmdastjóra SART og viðskiptastjóra FP.

NEPU ráðstefnan er haldnir árlega og í fyrra var hún haldin á Íslandi. Á ráðstefnuna koma formenn og framkvæmdastjórar meistarafélaga í raf- og pípulögnum. Fulltrúar hvers lands höfðu framsögu í ákveðnum málum sem leiddi svo inn í umræður um stöðu viðkomandi málefnis í hverju landi fyrir sig.

Góðar umræður urðu um menntamál en auk þess voru umræður um nýtingu sólarorku á norrænum slóðum þar sem Norðmenn kynntu mjög áhugaverðar upplýsingar sem þeir hafa tekið saman. En þess má geta að norsku rafverktakasamtökin, NELFO, hafa gefið út vandað fræðsluefni um nýtingu sólarorku í landbúnaði þar sem fram koma mjög ýtarlegar upplýsingar fyrir bændur annars vegar og rafverktaka hins vegar. Þá vakti erindi Gunnars Sigurjónssonar mikla athygli en það fjallaði um markaðssetningu á varmadælum og þekkingu sem þarf að vera til staðar við val á búnaði og uppsetningu á honum þannig að orkan og tæknilegir möguleikar búnaðarins nýtist sem best.

Á ráðstefnunni hélt AAPO Cederberg, eigandi og framkvæmdastjóri Cyberwatch Finland, áhugavert erindi um gagnaöryggi og nauðsyn þess að gera ráðstafanir til að verjast vaxandi ógn af völdum tölvuglæpamanna og nefndi sérstaklega að Finnar hafi orðið varir við mikla aukningu á tölvuglæpum eftir innrás Rússa í Úkraínu. Þá má nefna að Kim Mattsson, Security Policy Advisor, kynnti fyrir fundarmönnum áherslur sem stjórnvöld í Finnlandi eru að beina til finnskra fyrirtækja í ljósi aukinnar ógnar frá Rússlandi eftir inngöngu Finna í NATO.

Fulltrúar Félags pípulagningameistara á NEPU 2023

Gunnar Ásgeir Sigurjónsson, Böðvar Ingi Guðbjartsson, formaður FP, Kristján Daníel Sigurbergsson, viðskiptastjóri FP

Meistaradeild Samtaka iðnaðarins, MSI, skorar á skólastjórnendur verknámsskóla að veita þeim nemendum forgang í iðnnám, sér í lagi við innritun í kvöldskóla, sem hafa lokið hluta starfsnáms og/eða starfað í iðngrein sæki þeir um að hefja eða ljúka námi í viðkomandi iðn. Þetta kemur fram í bréfi sem MSI hefur sent skólastjórnendum verknámsskóla. Það sama eigi við um þá aðila sem farið hafa í gegnum raunfærnimat og sækja um skólavist til að ljúka formlegu námi. Væri þessi að gerð til þess fallin að fjölga iðnmenntuðu starfsfólki á vinnumarkaði og mæta brýnni þörf iðnfyrirtækja.

Í bréfinu segir að í „Skýrslu starfshóps um innritun í starfsnám á haustönn 2022“, komi fram að þeim sem hafnað hafi verið um skólavist í starfsgreinum séu flestir eldri en 19 ára. Í húsasmíði og grunnnámi bygginga- og tæknigreina sé hlutfall 30 ára og eldri 37%. Á sama tíma sé mikil eftirspurn á vinnumarkaði eftir iðnmenntuðu starfsfólki. Að mati stjórnar MSI sé hér um skýra skekkju að ræða sem nauðsynlegt sé að bregðast við sem fyrst.

Endurskoða þurfi aðferðafræði við úthlutun á skólavist
Þá kemur fram í bréfinu að við innritun í kvöldskóla sé algengasta reglan sú að „fyrstur kemur fyrstur fær“ sem hafi í raun þau áhrif að ekki sé forgangsraðað í námið í þágu þeirra sem séu að reyna að ljúka námi til starfsréttinda eða séu nú þegar starfandi án réttinda í viðkomandi iðn og vilji öðlast viðeigandi réttindi. Þessa aðferðarfræði við úthlutun á skólavist þurfi að mati stjórnar MSI að endurskoða.

Jafnframt segir í bréfinu að þar sem kvöldskólar eða dreifinám séu í boði hafi það verið aðgengilegasta skólaleiðin fyrir þá einstaklinga sem séu komnir með fjölskyldu og séu að reyna að ná sér í réttindi í faginu sem þeir séu starfandi við. Einstaklingar sem hafi farið í raunfærnimat þurfi jafnframt raunhæfar leiðir til að ljúka námi í samræmi við niðurstöður raunfærnimatsins. Breytt forgangsröðun gæti komið fjölmörgum einstaklingum hratt og örugglega út á vinnumarkaðinn með full réttindi.

Undir bréfið skrifa Jón Sigurðsson, formaður MSI, og Sævar Jónsson, varaformaður MSI.